महेन्द्रनगर । नेपाल-भारत सीमावर्ती क्षेत्रमा हुनसक्ने आपराधिक गतिविधि, लागूऔषध ओसारपसार र हतियार तस्करी नियन्त्रणका लागि सशस्त्र प्रहरी बलले कञ्चनपुरको गड्डाचौकी नाकामा तालिमप्राप्त कुकुरसहित जाँच सुरु गरेको छ।
चाडपर्वलाई मात्र लक्षित नगरी सशस्त्र प्रहरी बल नेपालले गड्डाचौकीस्थित सीमा सुरक्षा गुल्ममा ‘केनाइन शाखा’ नै स्थापना गरी शनिबार बिहानदेखि नियमित सुरक्षा जाँच थालेको हो।
सशस्त्र प्रहरी बल श्री नं ३५ शैलेश्वरी गणका गणपति सशस्त्र प्रहरी उपरीक्षक प्रेमप्रकाश सिग्देलका अनुसार देशका चार वटा मुख्य नाकामा यसअघि नै केनाइन शाखा सञ्चालनमा आइसकेका छन्। गड्डाचौकीमा स्थापना गरिएको यो शाखा सशस्त्र प्रहरीको देशकै पाँचौँ र सुदूरपश्चिम प्रदेशको हकमा पहिलो केनाइन युनिट हो।
नयाँ स्थापित शाखामा सशस्त्र प्रहरी सहायक निरीक्षक जगदीश भट्टको कमान्डमा ५ जना दक्ष जनशक्ति र दुई वटा तालिमप्राप्त कुकुर खटाइएको छ।
जसमा लेब्राडोर प्रजातिको ‘अल्फा’ (पोथी) ले सीमामा हुने लागूऔषध ओसारपसार र जर्मन सेफर्ड प्रजातिको ‘डेल्टा’ (भाले) ले हातहतियार तथा विस्फोटक पदार्थको खोजी एवं चेकजाँच गर्ने सशस्त्र प्रहरी उपरीक्षक सिग्देलले जानकारी दिए।
सीमामा सुरु गरिएको नियमित सुरक्षा जाँचको अनुगमनमा कञ्चनपुरका प्रमुख जिल्ला अधिकारी मदन कोइराला, सशस्त्र प्रहरी उपरीक्षक प्रेमप्रकाश सिग्देल र जिल्ला प्रहरी कार्यालय कञ्चनपुरका प्रहरी उपरीक्षक नेत्रमणि गिरीलगायतका सुरक्षा अधिकारीहरूको उपस्थिति रहेको थियो।
प्रतिक्रिया