लेखा समितिका सभापति ऋषिकेश पोखरेलकी पत्नी अञ्जला १० लाख धरौटी बुझाएर रिहा
विराटनगर । संसदको सार्वजनिक लेखा समितिका सभापति ऋषिकेश पोखरेलकी पत्नी अञ्जला कोइराला १० लाख धरौटी बुझाएर रिहा भएकी छन् ।
सहकारी ठगी कसुरमा बुधबार मोरङ जिल्ला अदालतका न्यायाधीश उद्धवकुमार भट्टराईको इजलासले कोइरालासँग १० लाख धरौटी माग गरेको थियो । अदालतको आदेशलगत्तै १० लाख रूपैयाँ बुझाएर रिहा भएकी हुन् ।
सहकारीसम्बन्धी कसुरमा मुद्दा चलाइएपछि कोइराला बुधबार अदालतमा उपस्थित भएकी थिइन् । उनी अदालतमा उपस्थित भएपछि उनीसँग बयान लिनुका साथै थुनछेक बहस भएको थियो ।
मोरङको धनपालथान गाउँपालिका–४ मा रहेको उमागौरी कृषि सहकारी संस्थाको रकम अपचलन प्रकरणमा कोइराला २६ जनाविरुद्ध मुद्दा दायर भएको छ। उक्त सहकारीमा अन्जला २०७२/०७३ देखि सञ्चालक समितिमा थिइन् । २२ करोड २८ लाख २७ हजार ७ सय रकम हिनमिना भएको दाबी गर्दै मुद्दा दर्ता भएको थियो ।
