घर बहालबाटै दुई महिनामा महानगरले उठायो ५२ करोड राजश्व
काठमाडौं । काठमाडौँ महानगरपालिकाले चालु आर्थिक वर्षको पहिलो दुई महिनाको अवधिमा एक अर्ब १७ करोड १३ लाख ७५ हजार रुपैयाँ राजस्व असुल गरेको छ ।
गत आर्थिक वर्षको सोही अवधिमा काठमाडौँ महानगरपालिकाले ९३ करोड ४१ लाख राजस्व असुल गरेको थियो । चालु आर्थिक वर्षका लागि महानगरले १० अर्ब ४१ करोड राजस्व असुलको लक्ष्य लिएको महानगरको राजस्व विभागका प्रमुख ध्रुव काफ्लेले जानकारी दिए ।
गत आर्थिक वर्षको सोही अवधिलाई तुलना गर्दा चालु आर्थिक वर्षको साउन र भदौमा २४ करोड भन्दाबढी राजस्व असुल भएको छ । चालु आर्थिक वर्षको दुई महिनाको अवधिमा सबैभन्दा बढी घरबहाल करबाट ५२ करोड असुल भएको राजस्व विभागका प्रमुख काफ्लेले बताए ।
त्यसैगरी सम्पत्ति करबाट २५ करोड असुल भएको छ । पछिल्लो समय महानगरमा बहाल कर तिर्ने करदाता बढेकाले राजस्व रकम बढेको प्रमुख काफ्लेको भनाइ छ ।
