काठमाडौं प्रहरी प्रमुख कार्की र अपराध अनुसन्धान कार्यालयका प्रमुख केसीको सरुवा
काठमाडौं । नक्कली भुटानी शरणार्थी प्रकरणको अनुसन्धानमा संलग्न दुई प्रहरी अधिकृतको सरुवा भएको छ । काठमाडौं प्रहरी परिसर प्रमुख एसएसपी दानबहादुर कार्की र उपत्यका अपराध अनुसन्धान कार्यालयका प्रमुख एसएसपी मनोज केसीको सरुवा भएको हो ।
उनीहरुले नक्कली भुटानी शरणार्थी प्रकरणका आरोपितलाई पक्राउ गरी अनुसन्धानको नेतृत्व गरेका थिए । कार्कीको स्थानमा एसएसपी भूपेन्द्र खत्रीलाई ल्याइएको छ भने अपराध अनुसन्धानमा एसएसपी सामेन्द्रसिंह राठौर आएका छन् ।
यसअघि सरकारले शरणार्थी प्रकरणमा दोस्रो चरणको अनुसन्धान अघि बढाउन निर्देशन दिने उपत्यका प्रहरी कार्यालय, रानीपोखरीका एआईजी श्याम ज्ञवालीलाई पनि सरुवा गरिसकेको छ ।
