महानगरभित्रका सहकारीलाई ३० दिनभित्र सबै विवरण बुझाउन काठमाडौं महानगरपालिकाको निर्देशन

काठमाडौं । काठमाडौं महानगरपालिकाले महानगरभित्रका सबै सहकारी संस्थालाई ३० दिनभित्र विवरण पेस गर्न निर्देशन दिएको छ । महानगरपालिकाको सहकारी विभागले बुधबार सूचना जारी गरी साधारणसभाको जानकारी, लेखापरीक्षण प्रतिवेदनलगायतका विवरण एक महिनाभित्र बुझाउन निर्देशन दिएको हो ।

सूचना जारी भएको मितिले ३० दिनभित्र विवरण पेस नगरे महानगरको सहकारी ऐनअनुसार कारबाही गर्ने चेतावनीसमेत दिइएको छ । केही सहकारी संस्थाहरूले साधारणसभाको जानकारी, लेखापरीक्षण प्रतिवेदनलगायत तोकिए बमोजिमका विवरणहरू समयमा नै पेस गर्ने गरेको नपाइएको हुँदा सूचना प्रकाशित गरिएको महानगरले जनाएको छ ।