अर्थमन्त्रीको जवाफपछि ओलीले भने-शंकाको सुविधा दिन सकिन्छ
काठमाडौं । नेकपा एमालेका अध्यक्ष केपी शर्मा ओलीले अर्थमन्त्रीले दिएको जवाफमा शंकाको सुविधा दिन सकिने बताएका छन् । सोमबारको प्रतिनिधिसभा बैठकमा अर्थमन्त्रीको जवाफपछि विनियोजन विधेयकका सिद्धान्त र प्राथमिकतामाथिको छलफलमा भाग लिँदै अध्यक्ष ओलीले करका दरमा भने प्रश्न रहेको तर अर्थमन्त्रीलाई शंकाको सुविधा दिन सकिने बताएका हुन् ।
उनले भने, ‘अर्थमन्त्रीज्यूलाई ‘बेनिफिट अफ डाउट’ दिन सकिन्छ । धन्न अर्थमन्त्रीले जवाफ दिनेक्रममा कसम खानु भएन । कसम खानेहरु बडा खतरनाक हुन्छन् ।’
उनले एक हजार गाडी एक दिनअघि भित्रिएको भन्दै त्यसले शंका जन्माएको बताए । उनले धान, गहुँ र मकै बढाउने कुरामा चासो नभएको तर गाँजामा चासो राखिएको भन्दै आपत्ति जनाए ।
उनले भने,’कसका लागि गाँजा खेती। कसले गर्न खोजेको छ गाँजा खेती । यो नियन्त्रित र नियोजित हो। लाइसेन्स लिएर गरेको रहेछ भनेमात्रै हो नभए झ्यालखाना जान्छ ।’गाँजा खेती र व्यापार गर्नेहरु कोही पनि अहिले नदेखिएको बताउँदै पहिले अन्नमा आत्मनिर्भर हुनुपर्नेमा जोड दिए।