मिटरब्याज पीडितको आन्दोलन फिर्ता, सरकारसँग पाँच बुँदे सहमति
काठमाडौं । सरकारी वार्ता टोली र मिटरब्याजविरुद्धको संघर्ष समितिबीच पाँच बुँदे सहमति भएको छ । शनिबार सरकार र समितिबीच पाँच बुँदे सहमति भएको हो ।
सहमतिसँगै समितिले संघर्षका सम्पूर्ण कार्यक्रम फिर्ता लिएको छ । सहमतिअनुसार सरकारले मिटरब्याज अपराध नियन्त्रण सिफारिस कार्यदलको प्रतिवेदनका सिफारिस कार्यान्वयन गर्न सहजीकरण गर्ने, समस्या समाधानका लागि जाँचबुझ आयोग गठन गर्नेलगायतका विषयमा सहमति भएको छ ।
महोत्तरीको बर्दिबासबाट ११ दिन हिँडेर केही दिनअघि काठमाडौं आएका उनीहरुले काठमाडौंमा आन्दोलन सुरु गरेका थिए । उनीहरुले शनिबार बिहान प्रधानमन्त्री पुष्पकमल दाहाल प्रचण्डसँग पनि भेट गरेका थिए । भेटमा प्रधानमन्त्रीले उच्चस्तरीय आयोग गठन गरी यसको दीर्घकालीन समाधान गर्ने बताएका थिए ।
