एक रुपैयाँ पनि हिनामिना भएको भेटियो भने मलाई यही रंगशाला निर्माणस्थलमा खाल्डो खनेर पुरिदिए हुन्छ(भिडियोसहित)
काठमाडौं । धुर्मुस सुन्तली फाउन्डेसनका संस्थापक सीताराम कट्टेलले रंगशालाको काम अघि बढ्न नसक्दा आफूले डेढ वर्षदेखि मानसिक यातना भोगिरहेको बताएका छन् । मंगलबार सामाजिक संजालमार्फत कट्टेलले रंगशालाको काम अघि नबढ्दा आफूले मानसिक यातना भोगिरहेको बताएका हुन् ।
उनले एउटा रंगशाला बनाउनु के अपराध थियो त भन्दै प्रश्न गरेका छन् । उनले भनेका छन्, ‘ काम अघि नबढ्दा म दुई वर्षदेखि मानसिक यातना भोगिरहेको छु । डिप्रेसिभ छु । आज क्रिकेटले जुन सफलता हासिल गरेको छु । जुन उचाइमा पुगेको छ । एक चोटी महसुस गरौं । एउटा रंगशाला आवश्यक रहेछ की रहेनछ ? एउटा स्तरीय रंगशाला नहुँदा नहुँदै नेपाली खेलाडीले शीर उचो बनाएका छन् । ती खेलाडीलाई खेल्ने एउटा रंगशाला बनाउनु के अपराध थियो । के हामीले पाप गरेका थियौं ?’
उनले रंगशाला निर्माणमा आफूले कुनै गल्ती नगरेको र भेटिए जुनसुकै सजाय खेप्न तयार रहेको बताएका छन् ।
उनले भने, ‘यदि एक रुपैयाँ पनि हिनामिना भएको भेटियो भने मलाई यही रंगशाला निर्माणस्थलमा खाल्डो खनेर पुरिदिए हुन्छ तर, अब यो मानसिक यातना धेरै सहन सक्दिनँ ।’ उनले आफूहरु रंगशाला छोडेर कतै भागेको नभइ रंगशाला कुरेर बसिरहेको बताए ।
