गोंगबु क्षेत्रमा लुटपाटमा संलग्नलाई कारबाही गर्न प्रहरीलाई गृह मन्त्रालयको निर्देशन
काठमाडौँ । गृह मन्त्रालयले सोमबार काठमाडौंको गोंगबु क्षेत्रमा प्रदर्शनको क्रममा लोत्से मलमा तोडफोड गरी मोबाइल लगायतका सामग्री लुटपाटमा संलग्नलाई पक्राउ गरी कारबाही गर्न प्रहरीलाई निर्देशन दिएको छ ।
मंगलबार गृहसचिव बिनोद सिंहले प्रहरी महानिरीक्षक धीरजप्रताप सिंहलाई टेलिफोन गरी घटनामा संलग्नहरुलाई कारबाही गर्न निर्देशन दिएका हुन् ।
गृह मन्त्रालयका प्रवक्ता जितेन्द्र बस्नेतका अनुसार गृहसचिवले यो प्रहरीको नियमित काम भएकाले दोषीलाई कारबाही गर्न निर्देशन दिइएको हो ।
यातायात व्यावसायी र मजदुरहरुले गरेको प्रदर्शन भड्किएपछि लोत्से मलमा लुटपाट चलेको थियो । प्रदर्शनकारीहरुले पसल तोडफोड गरेर मोबाइल लगायतका सामग्री लुटेका थिए ।
त्यस्तै प्रदर्शनका क्रममा प्रहरीको भ्यान र अन्य भवनहरु समेत तोडफोड भएकाले त्यसमा संलग्नलाई पनि कारबाही गर्ने मन्त्रालयले निर्देशन दिएको हो ।
