विवाद र प्रश्न उठेका सबै न्यायाधीशले राजीनामा दिने हो भने मैले पनि राजीनामा दिन्छुः प्रधानन्यायाधीश जबरा
काठमाडौँ । प्रधानन्यायाधीश चोलेन्द्र शम्शेर जबराले सडकमा राजीनामा माग्दैमा आफूले राजीनामा नदिने बताएका छन् । सर्वोच्च अदालतका न्यायाधीशहरूसँग मंगलबार भएको छलफलमा प्रधानन्यायाधीश जबराले आफू संवैधानिक बाटोबाट आएको र संवैधानिक हिसाबले नै बाहिरिने बताएका हुन् ।
सर्वोच्चका १५ जना न्यायाधीशले प्रधानन्यायाधीश जबरालाई भेटेर मार्ग प्रशस्त गर्न आग्रह गरेपछि जबराले यस्तो जवाफ दिएका हुन् । प्रधानन्यायाधीश जबराको भनाइ उद्धृत गर्दै एक न्यायाधीशले भने, ‘विवाद र प्रश्न उठेका सबै न्यायाधीशले राजीनामा दिने हो भने मैले पनि राजीनामा दिन्छु । सडकको आवाजका भरमा राजीनामा दिने हो भने न्यायपालिका बच्न सक्दैन । म संवैधानिक बाटोबाट आएको हो, संविधानको व्यवस्थाअनुसार नै कायम रहन्छु ।’ प्रधानन्यायाधीशलाई भेटेर न्यायाधीशहरू फेरि सामूहिक छलफलमा बसेका छन् ।
मन्त्रिपरिषद् भागबन्डा मागेको भन्दै प्रधानन्यायाधीश राणा विवादमा तानिएका छन्। राजीनामा गर्न उनलाई चौतर्फी दबाब परेको छ ।