अफगानिस्तानबारे सरोकारवाला देशहरुसँग वार्ता गर्न सरकारलाई पूर्वराजदूतहरुको आग्रह
काठमाडौं । पाँच जना पूर्वराजदूतले अफगानिस्तानको राजनीतिक घटनाक्रमका कारण उत्पन्न चुनौतीहरुलाई सम्बोधन गर्न तुरुन्तै सरोकारवाला देशहरुसँग वार्ताको पहल गर्न सरकारलाई आग्रह गरेका छन् ।
पूर्वराजदूतहरु हिरण्यलाल श्रेष्ठ, दीपकुमार उपाध्याय र दुर्गेशमान सिंह, डा. सुरेश चालिसे र डा. महेश मास्केले मंगलबार संयुक्त विज्ञप्ति जारी गरी अफगानिस्तानमा तालिबानको राजनीतिक अग्रसरता सार्क सदस्य राष्ट्रहरुको लागि चासो र चिन्ताको विषय भएको उल्लेख गरेका हुन् ।
विज्ञप्तिमा भनिएको छ, ‘यो गम्भीर मोडमा सार्कको अध्यक्षको हैसियतमा नेपालले यस क्षेत्रमा स्थिरताको लागि महत्वपूर्ण भूमिका खेल्न सक्छ । हामी नेपाल सरकारलाई अफगानिस्तानको राजनैतिक घटनाक्रमले उत्पन्न चुनौतिहरुलाई सम्बोधन गर्न तुरुन्तै सरोकारवाला देशहरुसँग वार्ताको लागि आवश्यक पहल गर्नको लागि आग्रह गर्दछौं ।’