महन्थ ठाकुरको पार्टीको नाम ‘लोकतान्त्रिक समाजवादी पार्टी नेपाल’ रहने
काठमाडौं । जनता समाजवादी पार्टी (जसपा)बाट अलग भएको महन्थ ठाकुर पक्षले पार्टीको नाम लोकतान्त्रिक समाजवादी पार्टी नेपाल प्रस्ताव गरेको छ ।
जसपा नेपालबाट अलग हुने निवेदन पेस गर्दा ठाकुर पक्षले निर्वाचन आयोगमा जनता समाजवादी पार्टी नेपाल (लोकतान्त्रिक) दाबी गरेको थियो । आफ्नो पार्टीसँग मिल्दोजुल्दो नाम नदिन यादव पक्षले निर्वाचन आयोगको ध्यानाकर्षण गराएपछि आयोगले अर्को नाम प्रस्ताव गर्न पत्र पठाएको थियो ।
निर्वाचन आयोगको पत्रअनुरूप ठाकुर पक्षले आफ्नो पार्टीको नाम लोकतान्त्रिक समाजवादी पार्टी नेपाल (लोसपा) राखेको छ । नेताहरू सुरेन्द्र झा र केशव झाले शुक्रबार निर्वाचन आयोग पुगेर नयाँ दलको नाम बुझाएको हो ।
नेता केशव झाका अनुसार अब दल दर्ताका लागि आयोगले निर्णय दिएपछि आधिकारिकता पाउने छ । पार्टीको अध्यक्षमा महन्थ ठाकुर र बरिष्ठ नेताहरूमा राजेन्द्र महतो र शरत्सिंह भण्डारी रहने निर्णय भएको छ ।
