बहुमतको प्रधानमन्त्री नियुक्तिको प्रक्रिया प्रारम्भ गर्न राष्ट्रपतिलाई देउवा, प्रचण्ड र उपेन्द्र यादवको आग्रह
काठमाडौं । प्रधानमन्त्री केपी शर्मा ओली संसदमा विश्वासको मत लिन असफल भएपछि नयाँ सरकार गठनका लागि दलहरुले राष्ट्रपति विद्यादेवी भण्डारीलाई आग्रह गरेका छन् ।
नेपाली कांग्रेसका सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल प्रचण्ड र जनता समाजवादी पार्टीका अध्यक्ष उपेन्द्र यादवले सोमबार संयुक्त विज्ञप्ति जारी गरी राष्ट्रपति भण्डारीलाई संविधानको धारा ७६ को उपधारा २ बमोजिम प्रधानमन्त्री नियुक्तिको प्रक्रिया प्रारम्भ गर्न आग्रह गरेका हुन् । प्रधानमन्त्री ओलीले संसदमा विश्वासको मत माग्दा पक्षमा ९३ र विपक्षमा १२४ मत परेको थियो ।