खुमलटारमा प्रधानमन्त्री ओली र प्रचण्डबीचको भेटमा वामदेव पनि सहभागी
काठमाडौँ । प्रधानमन्त्री केपी शर्मा ओली र पार्टीका कार्यकारी अध्यक्ष पुष्पकमल दाहाल प्रचण्डबीच प्रचण्ड निवास खुमलटारमा भेटवार्ता भएको छ । पार्टीमा आन्तरिक विवाद बढिरहेका बेला शनिबार बिहान प्रचण्डलाई भेट्न प्रधानमन्त्री ओली खुमलटार पुगेका थिए । प्रचण्ड निवास खुमलटारमा दुई नेताबीच एकघण्टा भन्दा बढी छलफल भएको थियो ।
प्रचण्ड र ओलीबीच छलफल भइरहेकै बेला पार्टी उपाध्यक्ष वामदेव गौतम पनि खुमलटार पुगेका थिए । भेटपछि प्रधानमन्त्री ओली र गौतम खुमलटारबाट फर्किइसकेका छन् । त्यहाँबाट प्रधानमन्त्री ओली गृहमन्त्री रामबहादुर थापालाई भेट्न मन्त्री निवास पुल्चोक गएका छन् । प्रधानन्त्री खुमलटारबाट निस्किएपछि पार्टीका वरिष्ठ नेता माधवकुमार नेपाल खुमलटार पुगेका छन् ।
पार्टीमा आन्तरिक विवाद बढिरहेका बेला नेताहरु प्रचण्डलाई भेट्न खुमलटार जानुलाई अर्थपूर्ण रुपमा हेरिएको छ । प्रधानमन्त्रीमा निर्वाचित भएपछि पहिलो पटक ओली दाहाललाई भेट्न उनकै निवास गएका हुन् । शुक्रबार मात्रै दाहाल–नेपाल समूहले पेरिसडाँडामा प्रदेश एकका जिल्ला अध्यक्ष र सचिवहरुको भेला आयोजना गरेका थिए ।