प्रहरी समायोजनको संगठन तथा व्यवस्थापन सर्वेक्षण प्रस्ताव पारित

काठमाडौं । सरकारले प्रहरी समायोजनको संगठन तथा व्यवस्थापन सर्वेक्षण प्रस्ताव पारित गरेको छ । गृहमन्त्री रामबहादुर थापा नेतृत्वको समन्वय समितिको बैठकले प्रस्ताव पारित गरेको हो । प्रहरी समायोजनमा संघीय गृहमन्त्रीको नेतृत्वमा सातै प्रदेशका आन्तरिक मामिला मन्त्री लगायतको समिति गठन भएको थियो ।

बुधबार प्रधानमन्त्री निवास बालुवाटारमा बसेको समितिको बैठकले सर्वेक्षण प्रस्ताव पारित गरेको हो । अब नेपाल प्रहरीका कर्मचारीलाई प्रदेशस्तरमा समायोजन गर्न बाटो खुल्नेछ।

यसअघि डीएसपीसम्म मात्रै प्रदेश मातहत रहने गरी प्रहरीको समायोजन प्रक्रिया थालिएको थियो। तर, कोरोनाका कारण काम योजना अगाडि बढ्न सकेको थिएन । गृहले एसपी र एसएसपी संघ मातहत नै रहने गरी पुल दरबन्दीमा राखेर प्रदेशमा खटाउने गृहकार्य गरेको थियो । बुधबारको बैठकले अनुमोदन गरेको समायोजनको विस्तृत विवरण सार्वजनिक भइसकेको छैन ।