सप्तकोशीमा पानीको बहाव उच्च, ५६ मध्ये ४८ वटा ढोका खोलियो
इटहरी । सप्तकोसी नदीमा पानीको बहाव उच्च भएपछि कोसी ब्यारेजका ४८ वटा ढोका खोलिएको छ । पानीको बहाब बढेपछि आज बिहान ५६ मध्ये ४८ वटा ढोका खोलिएको हो ।
आज बिहान ५ बजेको मापनअनुसार कोसी ब्यारेज भएर ३ लाख २९ हजार ३ सय ८० क्युसेक पानी प्रतिसेकेन्डका दरले बहाव भइरहेको ब्यारेज नियन्त्रण कक्षले जनाएको छ ।
कोसी ब्यारेजको यो बहाव यो वर्षकै सबैभन्दा बढी हो । मंगलबार बिहानको बहावले खतराको सतह पार गरेकोले तटीय क्षेत्रमा सर्तक रहन स्थानीय प्रशासनले आग्रह गरेको छ ।
सप्तकोसीमा बहाव बढेसँगै पश्चिमी तटबन्धसँग टाँसिएका बस्तीहरु जोखिममा परेका छन् भने मध्यकोसीमा रहेको गोबरगाढा गाउँ पानीले घेरिएको छ ।
यसअघिकै बाढीमा स्थानीय तहले गोबरगाढाका बासिन्दाहरुलाई टापुबाट निकाल्ने प्रयास गरे पनि स्थानीयहरु निस्कन मानेका छैनन् । कोसीमा अत्यधिक बहाब भएसँगै बस्तीका घर घरमा पानी पसेको छ ।
