मुश्लिम समुदायले मनाए इद
काठमाडौं । मुस्लिम समुदायले आज इद उल फित्र पर्व मनाएका छन् । अरबी पात्रो हिजरी सम्वतअनुसार दशौँ महिनाको पहिलो दिन मुस्लिम समुदायले विशेष नमाज पाठ गरी ठूलाबडाबाट आशिर्वाद लिएर इद उल फित्र पर्व मनाउने चलन छ ।
विशेष नमाज पाठ गरेपछि तीन दिनसम्म आफूभन्दा ठूलाबडा कहाँ गएर आशीर्वाद लिने तथा आफूभन्दा सानालाई आशीर्वाद दिने गरिन्छ । आशीर्वाद लिन आउने आफन्तलाई सेवइ, खजुरलगायत मीठा खानेकुरा खान दिने चलन छ ।
खुशीपूर्वक गरिबलाई दान गरिने भएकाले सो पर्वलाई इद उल फित्र भनिएको हो । अरबी पात्रोअनुसार नवौँ महिनाको अन्तिम दिन चन्द्रमा देखिएपछि इद उल फित्र मनाउने कार्यक्रम तय हुने गरेको छ । यो पर्वको अर्को उल्लेखनीय पक्ष गरीबलाई दान दिनु हो ।
यस वर्ष कोरोना महामारीका कारण घण्टाघरस्थित जामे मस्जिदमा नवाज पढ्ने व्यवस्था भने गरिएको थिएन । मस्जिद, इदगाहलगायत धार्मिकस्थलमा पाँच जनाभन्दा बढी उपस्थित नहुने भएपछि घरमै परिवारका सदस्यबीच नमाज पाठ गरेर इद उल–फित्र मनाउँन आग्रह गरिएको छ । यस पर्वको अबसरमा सरकारले सोमबार सार्वजनिक विदा दिएको छ ।
