अखाद्य राहत सामग्री वितरण गरेको अभियोगमा कलैया उपमहानगरपालिकाका मेयर पक्राउ
काठमाडौं । लकडाउनका बेला समस्यामा परेका नागरिकलाई गुणस्तरहीन खाद्यवस्तु वितरण गरेको अभियोगमा बाराको कलैया उपमहानगरपालिकाका मेयर राजेश रायलाई प्रहरीले पक्राउ गरेको छ । जिल्ला प्रहरी कार्यालय, बाराबाट खटिएको प्रहरी टोलीले मंगलबार दिउँसो उनलाई कलैयाबाट पक्राउ गरेको हो ।
मेयर रायले राहतका नाममा गुणस्तरहीन चामल, दाललगायतका खाद्यबस्तु वितरण गरेको उजुरी परेपछि उनलाई नियन्त्रणमा लिएको प्रहरीले जनाएको छ ।
मेयर रायलाई अहिले जिल्ला प्रहरी कार्यालय, कलैयामा राखिएको छ । कलैया उपमहागरपालिकाका वडा नम्बर २२ मटिअरीया, वडा नम्बर ७ र २० मा चैत २८ गते वितरण गरिएको चामल, दाल कुहिएको भेटिएको थियो । राहत लिएकाहरुले फिर्ता गर्दै वितरण गर्नेलाई कारवाही माग गरेका थिए । राहत वितरण कार्यमा संलग्न सातजनालाई यसअघि नै प्रहरीले नियन्त्रणमा लिएको थियो ।