चिकित्सक कुटपिट प्रकरणः डिएसपी लम्साललाई जिम्मेवारीबाट हटाइयो
काठमाडौँ । त्रिभुवन विश्वविद्यालय शिक्षण अस्पताल महाराजगंजका चिकित्सकमाथि कुटपिट गर्ने महाराजगंज प्रहरी वृत्तका डीएसपी उमेश लम्साललाई छानबिनका लागि जिम्मेवारीबाट हटाइएको छ ।
उनलाई छानबिनका लागि महानगरीय प्रहरी कार्यालय रानीपोखरी तानिएको छ । बुधबार साँझ त्रिवि शिक्षण अस्पतालमा कार्यरत तीन जना चिकित्सकलाई कुटपिट गरेको आरोपमा अनुसन्धान गर्न लम्साललाई जिम्मेवारीबाट हटाइएको हो ।
महाराजगञ्ज वृत्तबाट खटिएको प्रहरीले कान्ति बाल अस्पताल पछाडि पैदल हिँडिरहेका त्रिवि शिक्षण अस्पतालका आवासीय चिकित्सक शम्भु खनाल, तेजप्रकाश साह र विकास शाहलाई आफूहरु चिकित्सक भएको भन्दा भन्दै कुटपिट गरेका थिए ।
नेपाल चिकित्स संघ लगायतले दोषीमाथि कारबाही नगरे देशभरको चिकित्सा सेवा प्रभावित हुने भन्दै चेतावनी दिएपछि लम्साललाई प्रहरीले जिम्मेवारीबाट हटाएको हो । घटनाको छानबिन गर्न एसएसपी किरण बज्राचार्यको नेतृत्वमा एसपी मुकेश सिंह र डीएसपी होविन्द्र बोगटी सम्मिलित तीन सदस्यीय छानबिन समिति गठन गरिएको छ ।
