चीनबाट उद्धार गरी ल्याएका १७५ जनामै देखिएन कोरोना भाइरसको संक्रमण
काठमाडौं । चीनको वुहानबाट उद्धार गरी नेपाल ल्याइएका १ सय ७५ जनामै कोरोना भाइरसको संक्रमण नेगेटिभ रहेको पाइएको छ । स्वास्थ्य मन्त्रालयले बुधबार पत्रकार सम्मेलन गरी उनीहरुको नमूना परीक्षण गरिएकोमा सबैमा कोरोना भाइरस (कोभिड—१९) नभएको पुष्टि भएको जनाएको हो ।
मन्त्रालयका प्रवक्ता महेन्द्रप्रसाद श्रेष्ठले राष्ट्रिय जनस्वास्थ्य प्रयोगशाला टेकुले गरेको परीक्षणका क्रममा सबैमा कोभिड—१९ नकारात्मक देखिएको जानकारी दिए । वुहानबाट ल्याइएकाहरुलाई भक्तपुरमा रहेको नेपाल विद्युत प्राधिकरणको तालिम केन्द्र खरिपाटीमा राखिएको छ । उनीहरुको १४ औं दिनमा पुनः परीक्षण गरिने मन्त्रालयले जनाएको छ ।
