भूकम्पले क्षति पुर्याएका सम्पदा आगामी दुई वर्षभित्रमा पुनर्निर्माण गरिसक्ने सरकारको लक्ष्य
काठमाडौै । २०७२ वैशाख १२ गतेको भूकम्पले क्षति भएका ४०० सम्पदाको पुनःनिर्माण सम्पन्न भएको छ । आइतबार आयोजित पत्रकार सम्मेलनमा संस्कृति, पर्यटन तथा नागरिक उड्डयन मन्त्री योगेश भट्टराईले भूकम्पले ३२ जिल्लाका ९२० सम्पदामा क्षति पुर्याएकोमा चार सयको पुननिर्माण भएको जानकारी दिएका हुन् ।
चालु आर्थिक वर्षमा १५० सम्पदाको पुनःनिर्माण भइरहेको छ । मन्त्री भट्टराईले बाँकी सम्पदाको पुननिर्माण आगमी २ वर्ष भित्रमा सम्पन्न गर्ने बताए । मन्त्री भट्टराईले नेपालमा संस्कृति, सभ्यता र प्राकृतिक पर्यटन मुख्य रहेको उल्लेख गर्दै पर्यटनको विकासका लागि पुरातात्विक सम्पदाको भूमिका बढाउनुपर्ने बताए ।
त्यसका लागि उपत्यकाका सात वटै विश्व सम्पदा सुचिमा सूचीकृत स्थलहरुलाई साइकल लेनले जोड्ने समेत बताए । विश्व सम्पदा स्थल लुम्बिनीभित्र भइरहेका विभिन्न गतिविधिले त्यहाँको विश्वव्यापी महत्वमाथि पार्न सक्ने नकारात्मक प्रभाव कम गर्न एकीकृत व्यवस्थापन प्रक्रिया स्वीकृतिको लागि आवश्यक तयारी भइरहेको विभागले जनाएको छ ।
