प्रधानमन्त्रीको स्वास्थ्यमा समस्या
काठमाडौं । नेपालले पहिलो पटक आयोजना गर्न लागेको ‘सगरमाथा संवाद’ कार्यक्रमको पूर्वतयारीका सन्दर्भमा आइतबार राजधानीमा आयोजना गरेको सगरमाथा राष्ट्रिय संवाद कार्यक्रममा प्रधानमन्त्री केपी शर्मा ओली अनुपस्थित भएका छन् ।
दरवारमार्गस्थित होटल याक एन्ड यतिमा आयोजना गरिएको कार्यक्रमको उद्घाटन प्रधानमन्त्री ओलीले गर्ने कार्यक्रम थियो । प्रधानमन्त्री अनुपस्थित भएपछि कार्यक्रमको उद्घाटन उपप्रधान तथा रक्षामन्त्री ईश्वर पोखरेलले गरेका छन् ।
प्रतिकूल स्वास्थ्यका कारण प्रधानमन्त्री आउन नसक्ने कार्यक्रममा जानकारी दिइएको थियो ।
प्रधानमन्त्रीलाई के भएको हो भन्नेबारे भने केही खुलाइएको छैन । यसैबीच, नेकपाको सचिवालय बैठक प्रधानमन्त्रीको अस्वस्थताका कारण स्थगित भएको छ । आइतवार बिहान बस्ने भनिएको सचिवालय बैठक स्थगित भएको हो
