अख्तियारका सचिवलाई १५ दिनभित्र उपस्थित हुन सर्वोच्चको आदेश
काठमाडौं । सर्वोच्च अदालतले अख्तियार दुरुपयोग अनुसन्धान आयोगका सचिव महेश्वर न्यौपानेलाई बोलाएको छ । बिहीबार सर्वोच्चका न्यायाधीशहरु मीरा खड्का, ईश्वरप्रसाद खतिवडा र सुष्मालता माथेमाको संयुक्त इजलासले न्यौपानेलाई १५ दिनभित्र आफै उपस्थित हुन आदेश गरेको हो ।
अदालतबाट माग गरिएका मुद्दासँग सम्बन्धित अभिलेख पेश गर्न आलटाल गर्ने र जिम्मेवारीबाट पन्छिन खोज्ने प्रवृति देखिएको भन्दै त्यो कार्य उचित नभएको भन्दै सर्वोच्चले यस्तो आदेश दिएको हो ।
नेपाल आयल निगमका तत्कालिन महाप्रबन्धक युवराज शर्माको भ्रष्टाचार मुद्दाको अभिलेख अख्तियारले पटक पटक मागेकोमा उपलब्ध नगराएपछि कागजात अभिलेख खोजी १५ दिनभित्र उपस्थित सर्वोच्चले आदेश दिएको छ । सर्वोच्च अदालतले २०७५ कात्तिक ८ गते र फागुन २३ गते कागजात पेश गर्न आदेश दिएको थियो । तर, अख्तियारले कागज फेला नपरेको जवाफ पेश गरेको थियो ।
