मेडिकल कलेज र सरकारबीचको सहमति विद्यार्थीलाई अस्वीकार्य
काठमाडौं । चिकित्सा शिक्षा संघर्ष समितिले चितवन मेडिकल कलेजमा प्रदर्शन गरेको छ । मेडिकल कलेजहरूले गैरकानुनी रूपमा उठाएको शुल्क फिर्ता गर्न माग गर्दै बुधबार विद्यार्थीहरुले प्रदर्शन गरेका हुन् ।
शिक्षा मन्त्रालय र मेडिकल कलेज सञ्चालकबीच एमबिबिएस पहिलो र दोस्रो वर्षको शुल्क समायोजन गर्ने सहमतिमा समितिले आपत्ति जनाएको छ । कारबाही गर्ने चेतावनी दिएपछि मेडिकल कलेज शुल्क समायोजन गर्न तयार भए पनि विद्यार्थीले तेस्रो, चौथो वर्षमा उठाइएको शुल्कको बारेमा मौन रहन नमिल्ने समितिको भनाइ छ ।
मंगलबार मन्त्रालय र निजी मेडिकल कलेज सञ्चालकबीच शुल्क समायोजन गर्ने सहमति भएको थियो । तर, सहमतिमा सहमतिमा नर्सिङ, फार्मेसी, बिपिएच, बिएमआइटीलगायत संकायमा तोकेभन्दा बढी शुल्क लिएको विषय नसमेटिएकाले आन्दोलन जारी राखेको संघर्ष समितिका संयोजक प्रकाश चन्दले बताए ।
मंगलबारको सहमतिमा आर्थिक वर्ष २०७४/०७५ र २०७५/०७६ मा भर्ना भएका विद्यार्थीको शुल्क समायोजन अथवा फिर्ता गर्ने भनिएको थियो। । २०७२/०७३ र २०७३/०७४ मा भर्ना भएका विद्यार्थीको हकमा छानबिन गर्ने र उपयुक्त निर्णय लिन चिकित्सा शिक्षा आयोगसमक्ष अनुरोध गर्ने उल्लेख थियो । सरकारले कारबाही गर्ने चेतावनी दिएपछि निजी मेडिकल कलेज सञ्चालक शुल्क समायोजन गर्न तयार भएका थिए ।
