खुमलटार भेलाको निष्कर्षः विचार तय नभई एकता महाधिवेशन असम्भव
काठमाडौं । सत्तारुढ नेकपाका अध्यक्ष पुष्पकमल दाहाल प्रचण्डले पूर्वमाओवादी केन्द्रतर्फका स्थायी कमिटी सदस्यहरुसँग छलफल गरेका छन् । सोमबार आफ्नै निवासमा अध्यक्ष प्रचण्डले आफू निकटका स्थायी कमिटी सदस्यहरुसँग छलफल गरेका छन् । छलफलले विचार तय नभइ एकता महाधिवेशन सम्भव नभएको निष्कर्ष निकालेको छ ।
छलफलमा पूर्वमाओवादीका सबै स्थायी कमिटी सदस्यहरूले पार्टी एकता बचाउन र अहिले देखिएको गतिरोधको निकास पहिलो वरीयताको अध्यक्ष भएकाले केपी ओलीले नै दिनुपर्ने निष्कर्ष निकालेका छन् । छलफलमा सहभागी स्थायी कमिटी सदस्य हरिबोल गजुरेलले पार्टी अध्यक्ष र प्रधानमन्त्री भएकाले केपी ओलीले नै निकासका लागि पहल गर्नुपर्ने बताए ।
उनले छिटोभन्दा छिटो बैठक टुंग्याएर समस्या समाधानतिर अघि बढ्नुपर्ने बताए । छलफलमा सहभागी नेताहरुले एकता बचाउने, विकास गर्ने, निष्कर्षमा पुर्याउने मुख्य दायित्व ओलीकै भएको बताएका गजुरेलले बताए ।
सदस्यहरूले वैचारिक कार्यदिशा तय नभइ महाधिवेशनमा जानुको औचित्य नरहेको बताएको उनको भनाइ थियो । गजुरेलले मङ्सिरमा महाधिवेशन सम्भव नभएको र यदि महाधिवेशन अघि सार्ने हो भने पहिले विचार टुङ्ग्याउनुपर्ने भनेर आफूहरुले सुझाव दिएको बताए।
