आमा बित्दासमेत दागबत्ती दिन सीमा पार गर्न नपाउने तर काठमाडौंबाट मान्छे उठाउन तराई जान चाहिं पाइने ?
नारायण गाउँले ।
सिङ्गो कर्मचारीलाई “.जी” भन्ने गोकुल बाँस्कोटालाई कुनै कारबाही भएन । छौंड़ादेखि ढेँडुसम्मका शब्द प्रयोग गर्नेहरू सल्लाहकार नै छन् । निरन्तर झूट र तुच्छ बोल्नेमात्रै होइन, सिङ्गो देशलाई नै लज्जाबोध हुने षड्यन्त्रमा बालुवाटारकै नेतृत्व देखियो, कसैलाई कारबाही हुँदैन । दुर्घटनामा मान्छेले ज्यान गुमाउँदा सरकारलाई अलच्छिना भनेर राजनीति गर्नेहरू नायक नै छन् । देशकै साइबर सुरक्षा र विश्वसनीयतामा प्रश्न उठ्ने गरी अपराध गर्नेहरू सल्लाहकार नै छन् ।
भीम उपाध्यायले फेसबुकमा गाली लेखे भनेर कारबाही हुन्छ । सत्ताले चाह्यो भने लकडाउनमै पनि काठमाडौंबाट मान्छे उठाउन तराई जान सकिने रहेछ, तर एउटा नागरिकले भने आमा बित्दासमेत दागबत्ती दिन सीमा पार गर्न पाउँदैन । लकडाउनमा राहत बाँडेको नाममा ज्ञानेन्द्र शाहीहरू समातिन्छन् ।
सरकारले ‘..जी र ढेँडु’ भन्न पाउने तर आम नागरिकले ‘तिमी’ भन्दा पनि शासकको अपमान हुने व्यवस्था पनि लोकतन्त्र हुन्छ र ?
