जिल्ला उपसभापतिहरूको प्रशिक्षण बहिस्कार गर्ने पौडेल पक्षीय भेलाको निर्णय
काठमाडौं । कांग्रेस वरिष्ठ नेता रामचन्द्र पौडेल समूहले जिल्ला उपसभापतिहरूको प्रशिक्षण बहिस्कार गर्ने भएको छ । चाक्सीबारीस्थित कांग्रेस नेता प्रकाशमान सिंहको निवासमा बसेको पौडेल समूहका उपलब्ध केन्द्रीय सदस्य र जिल्ला सभापति र उपसभापतिहरको भेलाले प्रशिक्षण बहिष्कार गर्ने निर्णय गरेको हो ।
बैठकले पार्टीको १४ औं महाधिवेशन प्रभावित गर्ने उद्देश्यका साथ प्रशिक्षण कार्यक्रम राखेको निष्कर्ष निकाल्दै जिल्ला उपसभापतिहरुको भेला बहिस्कार गर्ने निर्णय लिएको नेता प्रकाशमान सिंहले जानकारी दिए । १४ औं महाधिवेशनको तिथि मिति तोकिसकेकाले पार्टीमा निर्वाचन आचारसंहिता लागू भइसकेको र महाधिवेशनलाई प्रभावित गर्ने कुनै पनि काम अब पार्टीबाट गर्नु नहुने सिंहले बताए ।
चार वर्षसम्म निष्क्रिय रहेका सभापतिले पार्टी कब्जा गर्ने रणनीतिका साथ अहिले विभागहरु गठन गर्ने, जिल्ला उपसभापतिहरुको भेला गर्न थालेको पौडेल समूहको आरोप छ । सभापति शेरबहादुर देउवाले केही दिनअघि मात्र रिक्त विभाग गठन गरेका थिए ।