जुवाडेलाई नछाड्न सर्वोच्चको आदेश
काठमाडौं । सर्वोच्च अदालते शनिबार महाराजगञ्जबाट पक्राउ परेका ६ जना जुवाडेलाई नछाड्न आदेश दिएको छ । बुधबार सर्वोच्चका न्यायाधीश पुरुषोत्तम भण्डारीको इजलासले उनीहरुलाई थुनामै राख्न आदेश दिएको हो ।
महानगरीय प्रहरी वृत्त, महाराजगञ्जले छापा हानेर पक्राउ परेका मध्ये ६ जना भीआईपी जुवाडेको तर्फबाट आइतबार अदालतमा बन्दीप्रत्यक्षीकरणको रिट परेको थियो ।
बलराम सापकोटा, ठेकदार पवनकुमार गुप्ता, उद्योगी श्रवणकुमार गोयल, एयर डाइनेस्ट्रीका सञ्चालक पवित्रकुमार कार्की, जुवा खेलाउने विक्रम गौतम र मुक्ति लामाले रिट दायर गरेका थिए ।
उनीहरुको साथबाट दुई करोड ६७ लाख नगद, बैंक अफ काठमाडौंको ३ लाख रुपैयाँको चेक, ३२ थान कौडा र ४ बुक तास बरामद भएको थियो । पक्राउ परेका २४ जनाविरुद्ध जुवा ऐनअन्तरगत मुद्दा चलाउने प्रहरी तयारी छ ।
