फ्रान्समा वृद्ध मानिसले झिँगा धपाउन खोज्दा घरमा विस्फोट
फ्रान्सको एउटा गाउँमा एक वृद्ध मानिसले झिँगा धपाउने प्रयास गर्दा उनको घरमा विस्फोटन भएको छ । रातिको भोजन गर्न बस्न लागेको बेला एउटा झिँगाले दुःख दिएपछि ८० वर्षभन्दा बढी उमेरका ती व्यक्तिले झिँगा र कीराफट्याङ्ग्रा धपाउन प्रयोग गरिने विद्युतीय साधन चलाएका थिए । तर त्यही बेला घरमा ग्यास चुहिएकाले उक्त साधनसँग घर्षण हुँदा त्यहाँ विस्फोटन भयो ।
विस्फोटनले भान्सा ध्वस्त भयो भने घरको सानो भाग पनि आंशिक रूपमा क्षतिग्रस्त भयो । स्थानीय सञ्चारमाध्यमका अनुसार ती वृद्धको हातमा केही पोलेको भए पनि उनी सकुशल छन् । तर उनलाई बिथोल्ने झिँगाबारे “केही थाहा नभएको“ सुड वेस्ट समाचारपत्रले जनाएको छ । ती वृद्धले तत्काल अन्यत्र आश्रय लिएका छन् भने उनको परिवारले घर मर्मत गर्दैछ।