उपनिर्वाचनको नतिजाले ८४ को निर्वाचनको आधार तयार गरेको माओवादीको निष्कर्ष
काठमाडौं । नेकपा माओवादी केन्द्रले उर्जामन्त्री दीपक खड्काले नेपाल विद्युत प्राधिकरणमा कार्यकक्ष खोलेको विषयमा असन्तुष्टि जनाएको छ ।
बिहीबार बिहान बसेको पार्टी पदाधिकारी बैठकले मन्त्रीले प्राधिकरणमा कार्यकक्ष खोल्नुले सरकार विचौलिया र भ्रष्टाचारीलाई बचाउनतिर लागेको स्पष्ट भएको निष्कर्ष निकालेको हो ।
माओवादी उपाध्यक्ष अग्नि सापकोटाले सरकार प्राधिकरणको काममा अवरोध सृजना गर्ने काम गरेको बताए । उनले भने, ‘सरकारले विद्युत प्राधिकरणले गरिरहेको काममा अवरोध सृजना गर्ने काम गरेको छ। सरकारले विचौलिया जोगाउने, भ्रष्टाचारीहरूलाई बचाउने काम गरिरहेको छ ।सरकारले कामकारवाहीमाथि निगरानी तथा खबरदारी गर्छौं।’
उनले यसका लागि आगामी बस्ने स्थायी समिति बैठक र केन्द्रीय समिति बैठकमा छलफल गरी एजेण्डा बनाएर अघि बढ्ने बताए ।
त्यस्तै बैठकले स्थानीय तह उपनिर्वाचनमा आफ्नो पक्षमा आएको नतिजाले राम्रो सन्देश प्रवाह गरेको निष्कर्ष निकालेको छ । उपाध्यक्ष सापकोटाले गठबन्धन नगरी एक्लै चुनाव लड्ने पार्टीको निर्णयलाई जनताले अनुमोदन गरेको बताए ।
उनले भने,’विगतमा भएका कमीकमजोरीको समीक्षा गर्दै ८४ का लागि तयार गर्छौं । त्यसका लागि उपनिर्वाचनले निकै राम्रो आधार प्रदान गरेको छ।’
उनले बैठकमा उपनिर्वाचनको प्रारम्भिक समीक्षा, पालिका सम्मेलन र खबरदारी सभालगायत समसामयिक राजनीतिक विषयमा छलफल भएको जानकारी दिए।
