कोशीका आन्तरिक मामिलामन्त्री अधिकारीद्वारा पदबाट राजीनामा
विराटनगर । कोशी प्रदेशका आन्तरिक मामिला तथा कानुन मन्त्री लिलाबल्लभ अधिकारीले पदबाट राजीनामा दिएका छन् । मन्त्रिपरिषद्बाट स्वीकृत नगरी जापान भ्रमणमा गएको भन्दै विवादमा परेपछि मन्त्री अधिकारीले बुधबार राजीनामा दिएका हुन् ।
उनले बुधबार बिहान मुख्यमन्त्री हिक्मत कार्कीलाई राजीनामा बुझाएका छन् । मुख्यमन्त्रीका प्रेस सल्लाहकार विक्रम लुइँटेलले मन्त्री अधिकारीले राजीनामा बुझाएको जानकारी दिए ।
मन्त्रीहरूले विदेश भ्रमणमा जाँदा प्रधानमन्त्री तथा मन्त्रिपरिषद्को कार्यालयमार्फत परराष्ट्र मन्त्रालयको सहमति लिनुपर्ने व्यवस्था छ । तर मन्त्री अधिकारी मन्त्रिपरिषद्को स्वीकृति नलिई जापान भ्रमणमा गएका थिए । मन्त्री अधिकारी कात्तिक १३ गते टोकियो महानगरले आयोजनामा भएको कार्यक्रममा भाग लिन जापान गएका थिए ।
