ओली सरकारले एकसय दिनमा राम्रो काम गरेको देउवाको दाबी
भक्तपुर । नेपाली कांग्रेसका सभापति शेरबहादुर देउवाले ओली सरकारले एकसय दिनमा राम्रो काम गरेको बताएका छन् ।
शनिबार भक्तपुरमा शुभकामना आदानप्रदान तथा जय नेपाल भक्तपुर स्मारिका लोकार्पण कार्यक्रमलाई सम्बोधन गर्दै सभापति देउवाले अझै ओली सरकारले राम्रो काम गर्नेमा आफू विश्वस्त रहेको बताएका हुन् ।
सरकारको आलोचना हुनु स्वाभाविक रहेको भन्दै उनले आलोचनालाई पनि गम्भीरताका साथ लिएर अहिलेको सरकारले परिणाममुखी काम गरेर देखाउनुपर्ने बताए ।
उनले भने, ‘सय दिन बल्ल पुगेको छ ओलीजीको प्रधानमन्त्री कार्यकालको । यहाँ मात्र होइन जहाँ पनि सय दिनको कामको सम्बन्धमा आलोचना सबै हुन्छ । हामी सरकार भएको कारण मैले उहाँलाई भनेको होइन साच्चै राम्रो काम गर्नुभएको छ । मलाई विश्वास छ । अझै यस्तै राम्रो काम गर्नुहुने छ ।’
सभापति देउवाले यो देश ठूला दुई देशको बीचमा रहेकाले प्रधानमन्त्री ओली सबै कुरा ध्यानमा राखेर हरेक क्रियाकलापहरू गर्न सक्षम हुने बताए ।
