हवाई दुर्घटना न्यूनिकरणका लागि सधैं जाँचबुझ आयोग बनाएर मात्र हुँदैन, समग्र प्रक्रियाको अध्ययन हुनुपर्छः पर्यटनमन्त्री पाण्डे
काठमाडौं । संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले हवाई दुर्घटनाको छानबिन गर्न बनेका आयोगहरुले बुझाएका प्रतिवेदन कार्यान्वयनमा नआएका कारण नेपाली उड्डयन क्षेत्र असुरक्षित बनेको बताएका छन् ।
बिहीबार संसदको अन्तर्राष्ट्रिय सम्बन्ध एवम् पर्यटन समितिको बैठकमा मन्त्री पाण्डेले दुर्घटना हुनेबित्तिकै छानबिन समिति बनाएर मात्र दुर्घटनामा न्यूनीकरण गर्न नसकिने उल्लेख गर्दै नेपालको समग्र हवाई प्रक्रियाको अध्ययन गर्न जाँचबुझ आयोग गठन गर्नुपर्ने बताए ।
उनले बैठकमा बुधबार एयर डाइनेस्टीको हेलिकप्टर दुर्घटनाबारे पनि जानकारी गराए । अब पनि सधैं जाँचबुझ आयोग बनाइरहने र आयोगले बुझाएको प्रतिवेदन कार्यान्वयनमा नजाने हो भने नेपाली आकाश थप जटिलतामा फस्दै जाने बताए ।
उनले भने, ‘अब नेपालको समग्र हवाई सुरक्षाको बारेमा अध्ययन गर्नुपर्दछ । सिस्टममाथि नै अध्ययन गर्नुपर्ने जरुरी देखियो । समग्र अध्ययनका लागि मन्त्रालयले प्रस्ताव गर्नुपर्छ, मन्त्रिपरिषद्को बैठकमा छलफल हुनुपर्छ ।’
उनले नेपाली आकाश असुरक्षित बन्दै जानुको कारण कानुनी, नीतिगत, संरचनागत के समस्या हो त्यसको अध्ययनका लागि प्राविधिक र जनशक्ति लगायतका विषयमा अध्ययन गर्न समिति गठन गर्नका लागि समेत प्रधानमन्त्रीले निर्देशन दिएको उल्लेख गरे । उनले अब प्रधानमन्त्रीको निर्देशन अनुसार अघि बढ्ने बताए ।
नुवाकोटको शिवपुरी गाउँपालिका–७ सूर्यचौरमा बुधबार एयर डाइनोस्टीको हेलिकप्टर दुर्घटनामा परी पाइलट अरुण मल्लसहित चारजना चिनियाँ नागरिकको मृत्यु भएको थियो ।
मुलुकको उड्डयन क्षेत्रले भोग्नुपरेको नियति र हवाई क्षेत्रका समस्याको समाधान खोज्न सबैको साथ, सहयोग र सुझावको अपेक्षा गर्दै मन्त्रालयले तत्काल र दीर्घकालमा चाल्नुपर्ने कदमबारे सुझाव दिन उनले आग्रह समेत गरे ।
