कांग्रेसको विरोधका बीच सरकारको नीति तथा कार्यक्रम संसद्बाट बहुमतले पारित
काठमाडौं । विपक्षी दलहरुको नाराबाजीका बीच प्रतिनिधिसभाबाट आर्थिक वर्ष २०८१/०८२ को सरकारको वार्षिक नीति तथा कार्यक्रम पारित भएको छ ।
आइतबारको संसद बैठकमा नीति तथा कार्यक्रममाथि छलफल भएपछि सभामुख देवराज घिमिरेले संशोधन प्रस्तावलाई अस्वीकृत गरेका थिए । लगत्तै नीति तथा कार्यक्रम बहुमतले पारित गरेको सभामुखले घोषणा गरेका थिए ।
नीति तथा कार्यक्रममाथि छलफल जारी रहँदा प्रमुख प्रतिपक्षी दल नेपाली कांग्रेससहित विपक्षी दलहरूले नाराबाजी जारी राखेका थिए। नाराबाजीमा उत्रिएपछि सभामुख घिमिरेले पेलेर सदन अगाडि बढाएका थिए ।
सहकारी ठगी प्रकरणमा उपप्रधान एवं गृहमन्त्री रवि लामिछानेमाथि संसदीय छानबिन समिति गठनको माग गर्दै कांग्रेससहित विपक्षी दलहरूले संसदमा अवरोध गर्दै आएका छन्।