कांग्रेस सांसद टेकबहादुर गुरुङको निलम्बन फुकुवा
काठमाडौँ । नेपाली कांग्रेसका सांसद टेकबहादुर गुरुङको निलम्बन फुकुवा भएको छ । संघीय संसदका महासचिव पदम्प्रसाद पाण्डेयले बुधबार सूचना जारी गरी सांसद गुरुङको निलम्बन फुकुवाको जानकारी दिएका हुन् ।
महासचिव पाण्डेयले सर्वोच्च अदालतको आदेशबमोजिम सूचना जारी गरिएको जनाएका छन् । भ्रष्टाचार मुद्दा सर्वोच्च अदालतमा विचाराधीन रहेको अवस्थामा सर्वोच्च अदालतका न्यायाधीशद्वय मनोजकुमार शर्मा र विनोद शर्माको संयुक्त इजलासले सांसद गुरुङलाई निलम्बन गर्ने भनी संघीय संसद् सचिवालयबाट जारी सूचना बदर गरिदिएका थिए ।
मनाङबाट प्रतिनिधि सभा सदस्यमा निर्वाचित सांसद गुरूङ २०७९ पुस १२ गते निलम्बनमा परेका थिए । गुरुङमाथि अख्तियार दुरूपयोग अनुसन्धान आयोगले २०७५ माघ २१ गते भ्रष्टाचार मुद्दा दर्ता गरेको थियो । त्यसपछि उनी स्वतः निलम्बनमा परेका थिए ।