प्रदेश सरकार गठनमा गणितीय हिसाबले राप्रपाको अनिवार्यता देखिए छलफल गर्न सकिन्छः अध्यक्ष लिङ्देन
राजविराज । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले मधेसले गणतन्त्रबाट उपलब्धि नपाएको बताएका छन् । शुक्रबार सप्तरीको राजविराजमा आयोजित पत्रकार सम्मेलनमा अध्यक्ष लिङ्देनले संघीयतालाई संस्थागत गर्न अग्रणी योगदान गरेको मधेसले गणतन्त्रबाट उपलब्धि नपाएको बरु संघीयताका कारण प्रताडित बनेको बताएका हुन् ।
उनले हिन्दूत्वको भावना बलियो रहेको मधेशले धर्मनिरपेक्षता घोषणाका कारण हिन्दूत्वमा संकट पैदा भएको बुझ्न थालेको र मियोका रूपमा राजतन्त्रको आवश्यक्ता महसुस गरेको बताए ।
उनले मिटरव्याज, सहकारी, लघुबित्त, बैंक र वित्तिय संस्थाबाट मधेश पीडित रहेको र भ्रष्टाचार, बेरोजगारी बढेको दाबी गरे । उनले राप्रपाको मान्यताहरू उल्लेख नभएको संविधान आफ्नो पार्टीले नमान्ने बताए ।
अध्यक्ष लिङ्देनले सत्तालाई स्वार्थअनुकूल रक्षकवचका रूपमा प्रयोग गर्ने प्रधानमन्त्री नै अस्थिरतातर्फ गएपछि राप्रपा सत्तामा सामेल नभएको बताए । उनले सरकार प्राथमिकताको विषय नरहेको तर प्रदेश सरकार गठनमा गणितिय हिसाबले राप्रपाको अनिवार्यता देखिए छलफल गर्न सकिने बताए । त्यस्का लागि कतैबाट औपचारिक प्रस्ताव भने नआएको उनले बताए ।
उनले गृहमन्त्रीले आफूमाथि लागेका आरोपको सफाइ पेश गर्न सक्नुपर्ने बताए । उनले भने,’जिम्मेवारीमा बसेकामाथि लिखित वा अलिखित प्रश्न उठेपछि जवाफ दिनुपर्छ र सफाइ पेश गर्नुपर्छ ।’
