नागरिकले नागरिकता प्राप्त नगर्दाको पीडा हामीहरुलाई राम्रोसँग जानकारी छः सभापति लामिछाने
काठमाडौँ । राष्ट्रिय स्वतन्त्र पार्टीका सभापति रवि लामिछानेले संसदमा केही दिनअघि भएको बहसको विषयलाई लिएर आत्मालोचना गरेका छन् ।
बिहीबारको प्रतिनिधिसभा बैठकमा सभापति लामिछानेले प्रधानमन्त्रीको भारत भ्रमणको विषयलाई लिएर भएको बहसप्रति आत्मालोचना गरेका हुन् । आफ्नो पार्टीको तर्फबाट राँगा भैंसीको विषयमा भएको गलत बहसमा आफूले आत्मआलोचना गर्ने बताए ।
उनले भने,’संसदमा भैँसी र राँगाको विषयमा बहस गरेर पाँच वर्ष गुजार्ने काम होइन । यस विषयमा सत्ता पक्ष र प्रतिपक्ष वादविवादमा लागेर लज्जित भएका छौँ हाम्रो पार्टीबाट भएको गल्तीमा म आत्मआलोचना गर्न चाहन्छु ।’
उनले आफ्नो पार्टीले नागरिकता विधेयकको विरोध नगरेको बताए । उनले आफूहरुले प्रक्रियाको मात्र विरोध गरेको बताए । लामिछानेले रास्वपा जन्मसिद्ध नागरिकका सन्तानले र एकल आमाका सन्तानले नागरिकता पाउनुपर्छ भन्नेमा दृढ रहेको बताए ।
उनले भने,’विधेयक संसदमा आएको भए हामी छलफल गर्थ्यौं, स्वामित्व लिन्थ्यौं तर जुन बाटोबाट प्रमाणीकरण भयो जम्मा विपत्ति यत्तिमा हो । सदनमा आएर छलफल भएको भए त्यहाँ भएको विभेदबारे कुरा गर्ने थियौं ।’
वैवाहिक अंगीकृतको विषयमा विभेद गरिएको पनि लामिछानेको भनाइ थियो । उनले आफ्नो पार्टी नागरिकता विधेयकको विपक्षमा रहेको भाष्य निर्माण गरिएको भन्दै आपत्ति जनाए ।
उनले भने,’नागरिकता विधेयकका सम्बन्धमा राष्ट्रिय स्वतन्त्र पार्टी कुनै समुदायविरुद्ध छ भन्ने भाष्य जबर्जस्ती निर्माण गरेर निमुखा नागरिकलाई गुमराहमा राख्न खोजिएको छ । जनतामा भ्रमित हुने गरी रास्वपाविरुद्ध अफवाह फैलाइएको छ। त्यसमा हामीलाई आपत्ति छ । नागरिकले नागरिकता प्राप्त नगर्दाको पीडा हामीहरुलाई राम्रोसँग जानकारी छ । कुनै पनि नेपाली नागरिक नागरिकताबाट वञ्चित हुन हुँदैन ।’
