चितवन कांग्रेसका विद्रोही नेताको साथ जितनारायणलाई
काठमाडौं । गत निर्वाचनमा विद्रोह गरेका नेपाली कांग्रेसका चितवनका नेताहरुले उपनिर्वाचनमा पार्टीका आधिकारिक उम्मेदवार जितनारायण श्रेष्ठका लागि मत मागेका छन् ।
संयुक्त विज्ञप्ति जारी गरी चितवन कांग्रेसका पूर्वसभापति कृष्णलाल सापकोटा, नेता दिनेश कोइराला, पूर्वसांसद भिमबहादुर श्रेष्ठ र महासमिति सदस्य मिना खरेलले चितवन–२ मा सत्ता गठबन्धनको तर्फबाट कांग्रेसका उमेदवार जितनारायण श्रेष्ठलाई मत दिन अपील गरेका छन् ।
पूर्वसभापति सापकोटाले मंसिर ४ मा भएको संसदीय चुनावमा चितवन–३ बाट स्वतन्त्र उम्मेदवारी दिएका थिए । त्यस्तै गत निर्वाचनमा चितवन–३ बाट दिनेश कोइरालाले गठबन्धनविरुद्ध उम्मेदवारी दिएका थिए ।
