एमालेको विधान महाधिवेशन सर्यो, अब असोज १५ गतेदेखि हुने
काठमाडौँ । नेकपा एमालेको विधान महाधिवेशन सरेको छ । शनिबार बसेको स्थायी कमिटी बैठकले विधान महाधिवेशन असोज १५ देखि १७ गतेका लागि सार्ने निर्णय गरेको हो ।
यसअघि विधान महाधिवेशन असोज ४ देखि ६ गतेसम्मका लागि तोकिएको थियो । सचिव योगेश भट्टराईकाअनुसार दस्तावेज तयारी लगायत काम नसकिएकोले महाधिवेशन सारिएको हो ।
त्यसको तयारीका लागि असोज ३ र ४ गते स्थायी कमिटी बैठक बोलाइएको छ । उनका अनुसार बैठकमा विधान महाधिवेशनमा प्रस्तुत हुने विधान संशोधनसम्बन्धी प्रस्ताव, राजनीतिक प्रतिवेदन, संगठनात्मक प्रतिवेदनहरु प्रस्तुत हुनेछन् ।
स्थायी कमिटीमा ती प्रतिवेदनमाथि छलफल गरी प्राप्त सुझावहरुलाई असोज ८ र ९ गते बस्ने केन्द्रीय कमिटी बैठकमा पेस हुने छ । केन्द्रीय कमिटी बैठकमा छलफल गरी ती दस्तावेजहरु विधान महाधिवेशनमा पेस गरिने सचिव भट्टराईले जानकारी दिए ।
