पार्टीले कारवाही गरेका १४ सांसदलाई पदमुक्त गरेको सूचना टाँस्न सभामुखलाई एमाले सांसदहरुको दवाव
काठमाडौं । १४ जना सांसदलाई तत्काल कारबाहीको माग गर्दै नेकपा एमालेका केही सांसदहरु सभामुखको कार्यालयमा धर्ना दिन पुगेका छन् । एमालेले केहीदिन अघि कारबाही गरेका १४ सांसदको नाम नटाँसेको भन्दै एमालेका सांसदहरु शुक्रबार सभामुखको कार्यालय सिंहदरबारमा धर्ना दिन पुगेका हुन् ।
७२ घण्टा बितिसक्दा पनि सभामुख अग्नि सापकोटाले कारबाहीको सुचना सार्वजनिक नगरेको भन्दै बिरोधस्वरुप उनीहरु धर्ना दिन पुगेको एमाले सांसद महेश बस्नेतले जानकारी दिएका छन् ।
धर्ना दिन सांसद महेश बस्नेत, गोकुल बास्कोटा, खगराज अधिकारी, निरु पाल लगायत २० भन्दा बढी सांसद सभामुखको कार्यकक्ष पुगेका थिए । सांसदहरु धर्ना दिन पुगे पनि सभामुख भने कार्यकक्षमा थिएनन् ।
यसअघि बिहीबार पनि सभामुखको कार्यकक्षमा पुगेर नेकपा एमालेका सांसदहरूले उनीहरुको सांसद पद खारेज गर्न दवाव दिएका थिए ।
