प्रचण्डको व्यस्तताका कारण माओवादीको स्थायी कमिटी बैठक स्थगित
काठमाडौ । नेकपा माओवादी केन्द्रको आज बस्ने तय भएको स्थायी कमिटी बैठक स्थगित भएको छ । दिउँसो ३ बजेका लागि पार्टी मुख्यालय पेरिसडाँडामा बोलाइएको बैठक स्थगित भएको हो ।
नेताहरुको व्यस्तताका कारण बैठक स्थगित भएको पार्टी कार्यालयका सचिव श्रीराम ढकालले जानकारी दिए । पार्टी अध्यक्ष पुष्पकमल दाहाल प्रचण्ड र स्थायी कमिटी सदस्यहरुको व्यस्तताका कारण बैठक स्थगित भएको उनले बताए । माओवादीले आजको बैठकबाट सरकारमा पठाउने थप मन्त्रीको टुंगो लगाउने तयारी गरेको थियो ।
सत्तारुढ दलहरु भित्र सरकारमा सहभागी हुने मन्त्री छनौट हुन नसक्दा प्रधानमन्त्री शेरबहादुर देउवाले मन्त्रिपरिषदलाई पूर्णता दिन सकेका छैनन् । प्रधानमन्त्री देउवाले कांग्रेसबाट बालकृष्ण खाणलाई गृह र ज्ञानेन्द्रबहादुर कार्कीलाई कानुनमन्त्री बनाएका छन् भने माओवादीबाट जनार्दन शर्मालाई अर्थ र पम्फा भुसाललाई उर्जा मन्त्री बनाएका छन् ।
यस्तै कांग्रेसबाट उमेश श्रेष्ठलाई स्वास्थ्य राज्यमन्त्री बनाएका छन् । थप १९ मन्त्रीको नियुक्तिमा एमालेको माधव नेपालको निर्णय र कांग्रेस, माओवादी र जसपाबीच शक्ति सन्तुलनमा ठोस सहमति नहुँदा ढिलाइ भएको देखिन्छ ।
