‘रवीन्द्र मिश्रको प्रस्तावबाट वैकल्पिक राजनीतिको सपना बोकेका युवा सतर्क रहून्’
काठमाडौं । पूर्वप्रधानमन्त्री डा. बाबुराम भट्टराईले जनताको वलिदानीपूर्ण संघर्षबाट प्राप्त उपलब्धीका विरूद्ध कसैले बोल्यो भन्दैमा तरंगित हुनु नपर्ने बताएका छन् ।
विवेकशील साझा पार्टीका अध्यक्ष रवीन्द्र मिश्रले संघीयता खारेज गर्न र धर्मनिरपेक्षताबारे जनमत संग्रह गर्ने प्रस्ताव गरेपछि त्यसको जवाफमा भट्टराईले गणतन्त्रविरूद्ध धूप हाल्नेहरू राजतन्त्रका भूतमात्र भएको बताएका हुन् ।
उनले भनेका छन्, ‘झिंगाको सरापले डिंगा मर्दैन ! कसैले चर्चा बटुल्न जनताको वलिदानीपूर्ण संघर्षबाट प्राप्त उपलब्धीको विरूद्ध बोल्यो भन्दैमा तरंगित हुनपर्दैन । संघीय लोकतान्त्रिक गणतन्त्रविरूद्ध धूप हाल्नेहरू राजतन्त्रका भूतमात्र हुन् भन्न डराउनुपर्दैन ! बरू वैकल्पिक राजनीतिको सपना बोकेका युवा सतर्क रहून् !’
मिश्रले सोमबार आफ्नो व्यक्तिगत धारणा भन्दै संघीयता खारेजी र धर्मनिरपेक्षताकाबारेमा जनमत संग्रहको प्रस्ताव गरेका थिए । उनको त्यो प्रस्तावको उनकै पर्टीभित्र पनि विरोध भएको छ ।