‘खेलको क्याप्टेन संसदीय दलको नेता हुन्छ, क्याप्टेनले भनेको कुरा खेलाडीले मान्नैपर्छ’
काठमाडौं । वरिष्ठ अधिवक्ता सुरेन्द्र महतोले प्रधानमन्त्री नियुक्त गर्नका लागि एउटा दलको सांसद अर्कोमा गएर मिलेपछि राष्ट्रपतिलाई आधार उचित नलाग्नु स्वभाविक भएको तर्क गरेका छन् ।
बिहीबार संवैधानिक इजलासमा बहसका क्रममा महतोले पार्टीभित्रको सदस्य भएपछि आफ्नो पार्टीको निर्णयविपरीत गएर सांसद गणना गर्न नमिल्ने तर्क गरेका हुन् ।
उनले नेकपा एमाले र जसपाभित्रको एउटा पक्षले कांग्रेस सभापति शेरबहादुर देउवालाई कमाण्डर बनाई पाउँ भनेर राष्ट्रपतिकहाँ जान नमिल्ने जिकिर गरे ।
उनले भने भने,‘बहुदलीय शासन प्रणालीमा दल नै प्रमुख हुन्छ । खेलको क्याप्टेन संसदीय दलको नेता हुन्छ, क्याप्टेनले भनेको कुरा खेलाडीले मान्नुपर्छ ।’ त्यसक्रममा प्रधानन्यायाधीश चोलेन्द्रशम्शेर जबराले महतोलाई प्रश्न गरे, ‘विघटन नै नहोस् भनेर जनताप्रति उत्तरदायी हुनका लागि सांसदहरुले यो भूमिका खेलेको भन्ने कुरा आएको छ, यसमा अलि प्रस्ट पार्नुस् न ?’ जवाफमा महतोले दलको सदस्य भएपछि दलको नियम मान्नुपर्ने जिकिर गरेका छन् ।
