सदनलाई विघटनतिर नलैजानका लागि यो सरकारलाई समर्थन गर्नुको विकल्प छैनः मुख्यमन्त्री पोखरेल
काठमाडौं । गण्डकी प्रदेशका मुख्यमन्त्री कृष्णचन्द्र पोखरेल नेपालीले प्रदेशमा स्थायित्वको लागि विश्वासको मत दिन आग्रह गरेका छन् । शुक्रबार प्रदेशसभाको बैठकमा विश्वासको मत माग्दै मुख्यमन्त्री पोखरेलले संघीय लोकतान्त्रिक गणतन्त्रलाई संरक्षण गर्दै संघीयतालाई मजबुत र राजनीतिक स्थिरता दिन विश्वासको मत दिन आग्रह गरेका हुन् ।
जनताले दिएको मतादेश पाँच वर्षको लागि भएको भन्दै पोखरेलले बीचमा जनताबीच जानु कुनै पनि रुपमा उपयुक्त नहुने बताए । नीति तथा कार्यक्रम र बजेटमा प्रदेशका नागरिकलाई कोरोनाविरुद्धको खोप र स्वास्थ्यसम्बन्धी स्रोत साधन उपलब्ध गराउने प्रतिवद्धता गरेको पनि उनले बताए ।
यस्तै, महिलाहरुले भोग्नु परेको धेरै पीडामध्ये एक रहेको स्तन क्यान्सर र पाठेघरको मुखको क्यान्सरको उपचारमा शल्यक्रिया गर्दा लाग्ने खर्च प्रदेश सरकारले व्यहोर्ने निर्णय गरेको उनले बताए ।
मुख्यमन्त्री नियुक्त भएको ३० दिनभित्र प्रदेशसभाबाट विश्वासको मत लिनुपर्ने संवैधानिक प्रावधानअनुसार मुख्यमन्त्री पोखरेलले शुक्रबार प्रदेशसभा बैठकमा प्रस्ताव पेस गरेका हुन् । गत जेठ २९ गते उनी संविधानको धारा १६८ को उपधारा ५ बमोजिम मुख्यमन्त्री नियुक्त भएका हुन् ।
