ठाकुरसहित जसपाका चार नेता पार्टीबाट निस्कासित
काठमाडौँ । जनता समाजवादी पार्टी(जसपा) नेपालका अध्यक्ष उपेन्द्र यादव पक्षले अर्का अध्यक्ष महन्थ ठाकुरसहित चार नेतालाई पार्टीबाट निष्कासन गर्ने निर्णय गरेको छ ।
मंगलबार बसेको कार्यकारिणी बैठकले ठाकुरसहित वरिष्ठ नेता राजेन्द्र महतो, कार्यकारिणी सदस्य लक्ष्मणलाल कर्ण, सर्वेन्द्रनाथ शुक्लालाई पार्टी सदस्यबाट निष्कासन गर्ने निर्णय गरेको नेता मोहम्मद इस्तियाक राईले जानकारी दिएका छन् । यादव पक्षले यसबारे निर्वाचन आयोगलाई जानकारी गराइसकेको छ ।
यसअघि यादव पक्षले अर्का अध्यक्ष ठाकुरसहित चार जनालाई २४ घण्टे स्पष्टीकरण सोधेको थियो । तर त्यसको जवाफ ठाकुरसहितका नेताले दिएका थिएनन् । बरु ठाकुर पक्षले यादवलाई स्पष्टीकरण सोधेको थियो । ठाकुर पक्ष सरकारमा सामेल हुन लागेको छ । तर यादव पक्ष ओली सरकार बहिर्गमनको पक्षमा छ ।
