ओलीसँगको वार्तापछि माधव नेपालले भने- राजीनामा तत्काललाई टर्यो
काठमाडौं । नेपाल कम्युनिष्ट पार्टीका वरिष्ठ नेता माधवकुमार नेपालले तत्काललाई सांसद पदबाट राजीनामा दिने विषय टरेको बताएका छन् । प्रधानमन्त्री केपी शर्मा ओलीसँगको वार्तापछि वरिष्ठ नेता नेपालले राजीनामा दुई चार दिनलाई टरेको बताएका हुन् ।
पार्टीलाई २०७५ जेठ २ मा फर्काउनेलगायतका माग पूरा नगरे नेपाल पक्षले राजीनामा दिने बताएको थियो । वार्तापछि वरिष्ठ नेता नेपालले पार्टीभित्रको समस्याकाबारे दुबैले कुरा राखेको बताए । उनले फागुन २८ को निर्णय फिर्ता गर्ने र सर्वोच्चको फैसला अनुसार पार्टीलाई जेठ २ मा पुर्याउने विषयमा कुरा भएको निष्कर्ष भने निस्किनसकेको बताए ।
एमालेको आज बिहान बसेको स्थायी कमिटी बैठकले नेता नेपालसहित चार नेताको कारबाही फुकुवा गरेपछि दुई नेताबीच वार्ता भएको हो । माधव नेपाल पक्षले राजीनामा नदिने भएपछि बहुमतीय सरकार गठनको प्रक्रिया लगभग टुंगिएको छ । बहुमतको सरकार गठनका लागि आज राति नौ बजेसम्मको समय तोकिएको छ ।
