प्रचण्ड माओवादी केन्द्रको संसदीय दलको नेता चयन
काठमाडौं । नेकपा माओवादी केन्द्रको संसदीय दलको नेतामा अध्यक्ष पुष्पकमल दाहाल प्रचण्ड चयन भएका छन् । मंगलबार बसेको संसदीय दलको बैठकले प्रचण्डलाई दलको नेता चयन गरेको हो ।
एमालेसँग एकीकरण हुनुअघि पनि उनी दलको नेता थिए । दलको प्रमुख सचेतकमा देव गुरुङ र राष्ट्रिय सभा संसदीय दलको दलको नेतामा दिनानाथ शर्मा चयन भएका छन् । संसदीय दलको उपनेता र सचेतक चयन भने चयन गरिएको छैन । संसद सचिवालयले संसदीय पदाधिकारीको नाम मागेपछि माओवादी केन्द्रले पदाधिकारी चयन गरेको हो ।
यसैबीच, बैठकले एमालेमा गएका नेताहरूलाई माओवादीमै फर्काउन पहल गर्न तीन सदस्यीय कार्यदल समेत बनाएको छ । बैठकले नारायणकाजी श्रेष्ठ, वर्षमान पुन र देव गरूङ रहेको कार्यदल बनाएको हो । कार्यदलले एमालेमा गएका माओवादी केन्द्रका नेताहरू रामबहादुर थापा, टोपबहादुर रायमाझी, लेखराज भट्ट लगायतसँग फेरि एक पटक वार्ता गर्नेछ। यसअघि २४ घन्टे स्पष्टिकरण सोधेको र वार्तापछि पनि फिर्ता नभएमा राजनीतिक दल सम्बन्धी ऐन अनुसार कारबाही हुने नेता पुनले बताए।
