प्रधानमन्त्रीज्यूसँग पहिलो पटक प्रत्यक्ष कुराकानी गर्दाको अनुभव



शारदाप्रसाद त्रिताल ।

शाखा अधिकृतको रुपमा २०४९ सालमा गृह मन्त्रालयबाट मन्त्रिपरिषद् सचिवालयमा मेरो सरुवा हुन्छ । त्यहाँ प्रधानमन्त्री कार्यालय (त्यस समय प्रधानमन्त्री कार्यालय म प सचिवालयको एक शाखाको रुपमा रहेको थियो) को जनसम्पर्क फाँटमा डेढ महिना काम गरेपछि प्रधानमन्त्रीको पी ए शाखा (त्यो समय कन्ट्रोल रुम भनिन्थ्यो) मा खटाइन्छ ।

मेरो लागि त्यो प्रकृतिको जिम्मेवारी पूर्णत नयाँ हुन्छ।
त्यहाँ काम शुरु गरेको भोलिपल्ट स्वकीय सहसचिवज्यूले प्रधानमन्त्रीज्यूसँग परिचय गराउन भनेर भित्र लानु हुन्छ । प्रधानमन्त्रीज्यू कार्यकक्ष भन्दा भित्रपट्टिको कोठामा हुनुहुँदो रहेछ । स्वकीय सहसचिवज्यूले मेरो परिचय गराइदिएर बाहिर निस्कनु हुन्छ ।
प्रधानमन्त्रीज्यूले आफु अगाडिको सोफा देखाएर बस्न इशारा गर्नुहुन्छ । मलाई अफ्ठेरो अनुभूति हुन्छ । मलाई असहज भएको महसूस गरी प्रधानमन्त्रीज्यूले “अफ्ठेरो मान्नु पर्दैन, बस्नुहोस्” भन्नु हुन्छ र म सतर्कतापूर्वक सोफामा बस्छु ।

पारिवारिक र शिक्षा तथा विगतको अनुभव समेतका बारेमा प्रधानमन्त्रीज्यूले सोध्नु हुन्छ र म संक्षेपमा उत्तर दिन्छु ।
प्रधानमन्त्रीज्यू मादी-चैनपुर हुँदै दिंला-भोजपुर जाने क्रममा कुनै समय मेरो गाउँमा पुगेर खाना खाएर हिंडेको कुरा संस्मरण गर्नुहुँदा असाध्य खुशी लाग्छ ।

प्रधानमन्त्रीज्यूलाई मेरो बारेमा सुवीर सर (स्वकीय उपसचिव सुवीर खनाल) ले सबै जानकारी गराइसक्नु भएको रहेछ ।
यस अघि मैले पी ए शाखामा काम नगरेको जानकारी गराएपछि मलाई प्रधानमन्त्रीज्यूले दिनु भएको निर्देशनहरुको सार देहाय अनुसार छ-
– गर्नु पर्ने कामका सम्बन्धमा आफ्ना सिनियर र अनुभवीहरुबाट विस्तृत जानकारी लिइहाल्नु होला ।

– तपाइँहरुले गर्ने व्यवहारले सरकारको व्यवहारको प्रतिनिधित्व गर्ने हुनाले असाध्यै होसियारीपूर्वक व्यवहार गर्नु पर्छ ।
मसँग फोनमा कुरा गर्ने भनेर जोसुकैले तपाइँहरुलाई फोन गर्न सक्छन् । सबैको फोनको रेस्पोन्स गर्न मलाई सम्भव हुन्न । त्यसैले तपाइँहरुले कुनै वहाना बनाएर फोनकर्तालाई सन्तुष्ट बनाउनु पर्छ । कतिपय अवस्थामा ढाँट्नु पनि पर्छ । त्यसको पाप तपाइँहरुलाई लाग्दैन, पाप लाग्ने नै रहेछ भने मलाई लाग्ने हो ।

– फोनमा कुरा गर्न नपाउने व्यक्तिले तपाइँहरुलाई गाली गर्न सक्छन् । कुनै व्यक्तिले फोनमा जस्तोसुकै गाली गरेपनि तपाइँहरु गाली गर्नेप्रति रिसाउनु हुँदैन, नराम्रो जवाफ दिनुहुँदैन । त्यो गाली तपाइँहरुलाई गरेको होइन, मलाई गरेको हुन्छ ।

– फोन गर्नेहरुको के समस्या रहेछ बुझेर टिपोट गरी मलाई अथवा कार्यालयको सचिव वा स्वकीय सचिवहरुलाई जानकारी गराउने गर्नुहोला ।
– दरबारबाट पशुपतिजी (प्रमुख सचिव पशुपति महर्जन)ले मात्र फोन गर्नुहुन्छ । अरु कसैले दरबारबाट भनेर फोन गरेमा पशुपतिजी मार्फत आउन भनिदिने गर्नुहोला ।

– किसुनजी (पार्टी सभापति) र गणेशमानजीले फोन गर्नु भयो वा फोन गर्न भन्नु भयो भने म विदेशीसँग भेटघाटमा भएको अवस्थामा वाहेक तुरुन्त फोन सम्पर्क गराउनु होला ।

यसैवेला स्वकीय सहसचिव आउनुहुन्छ र “तपाइँको समय सकियो गृह मन्त्री आउँदै हुनुहुन्छ” भन्नु हुन्छ । म सोफाबाट उठेर प्रधानमन्त्रीज्यूलाई नमस्कार गरेर बाहिर जान लाग्दा गृहमन्त्री पस्नुहुन्छ ।

म उहाँलाई नमस्कार गर्छु । गृहमन्त्रीज्यूले “मेरो मन्त्रालयको राम्रो अफिसरलाई मन्त्रिपरिषदले लगिदियो, मेरो मन्त्रालयमा सबैले एउटा अनेष्ट र रेस्पोन्सिबल अफिसर सरुवा भएर गयो भनेर गुनासो गरेका छन्” भन्नु हुन्छ । प्रधानमन्त्रीज्यूले “हामीलाई चैं राम्रो अफिसर नभए पनि हुने हो र” भनेर गृह मन्त्रीज्यूलाई प्रतिप्रश्न गर्नुहुन्छ ।
स्वकीय सहसचिवज्यूको इशारा अनुसार म बाहिर निस्कन्छु ।
संस्मरणबाट...

यो खबर पढेर तपाईलाई कस्तो महसुस भयो ?

प्रतिक्रिया दिनुहोस
रवीन्द्र मिश्र र विवेकशील साझा पार्टी बारे !

केशवप्रसाद भट्टराई । नेपालका अधिकांश समस्या र चुनौतीसँग सामना गर्ने दृष्टिकोणको सवालमा रवीन्द्र

जिम्मेवारी सम्हालेको करिब एक वर्षपछि ओहोदाको प्रमाणपत्र

काठमाडौं । चीनका लागि नेपालका राजदूत महेन्द्रबहादुर पाण्डेले जिम्मेवारी सम्हालेको करिब १ वर्षपछि

लुटेरा तरिकाले सरकारमा पुग्नुपर्ने कुरा रोकिएपछि प्रतिगमन भयो भनेर हल्ला चलाइयोः प्रधानमन्त्री

काठमाडौं । मुलुकमा लोकतान्त्रिक आन्दोलनमा सरिक भएर ज्यानको आहुति दिने व्यक्तिको सम्मानमा ‘लोकतान्त्रिक

असामाजिक व्यक्तित्व विकार

डा. गोविन्दशरण उपाध्याय । जव कुनै व्यक्तिको व्यक्तित्वमा असमाजिकताको मानसिक दोष उत्पन्न हुन्छ,