ओली समूहमा रहेका नेताहरूलाई आफूतिर आउन प्रचण्ड-नेपाल समूहको आह्वान
काठमाडौं । नेकपाको प्रचण्ड–नेपाल समूहले प्रतिनिधिसभा पुनःस्थापना गर्ने सर्वोच्च अदालतको निर्णय ऐतिहासिक भएको ठहर गरेको छ । कोटेश्वर पेरिसडाँडामा बुधबार बसेको पार्टी स्थायी कमिटीको बैठकले सर्वोच्चको फैसला ऐतिहासिक भएको ठहर गरेको हो ।
बैठकले प्रधानमन्त्री केपी ओली समूहमा रहेका नेताहरूलाई आफूहरूतिर आउन आह्वान गर्ने निर्णयसमेत निर्णय गरेको प्रवक्ता नारायणकाजी श्रेष्ठले जानकारी दिए ।
बैठकले बैठकले प्रतिनिधिसभा विघटनविरुद्ध तय भएका पार्टीका सबै कार्यक्रमहरू रद्द गर्ने निर्णय गरेको छ । संसद विघटनको असंवैधानिक कदम चाल्ने प्रधानन्त्री केपी शर्मा ओलीले तत्काल राजीनामा दिनुपर्ने भन्दै यो समूहले नभए संविधान अनुसार अगाडि बढ्ने बताएको छ ।
प्रवक्ता श्रेष्ठले भने, ‘अहिलेसम्म उहाँले राजीनामा दिनु भएको छैन । त्यसो नभएको अवस्थामा सर्वोच्च अदालतको फैसला अनुसार प्रतिनिधिसभाको बैठक बस्दैछ । बैठकबाट संविधानअनुसार नै अरु प्रक्रिया अगाडि बढ्छ ।’
बैठकले लोकतन्त्रको हत्या गर्ने, पार्टी एकतालाई चोइट्याउने व्यक्तिसँग एकताको विषयमा कुरा हुन नसक्ने ठहर गरेको छ । बैठकले आफूहरूले गरेको आन्दोलनमा सहभागिता जनाएकोमा सबैलाई धन्यवाद दिएको छ । नेकपाको प्रचण्ड–नेपाल समूहको आजै संसदीय दलको बैठक बस्दैछ ।
