प्रदेश एकका मुख्यमन्त्रीविरुद्ध अविश्वासको प्रस्ताव पेश
काठमाडौँ । प्रदेश एकका मुख्यमन्त्री शेरधन राईविरुद्धको प्रदेशसभामा दर्ता भएको अविश्वास प्रस्ताव सदनमा पेस भएको छ । आइतबार बसेको बैठकमा सभामुखले समय दिएपछि अविश्वासको प्रस्तावका प्रस्तावक इन्द्रबहादुर आङ्बोले अविश्वासको प्रस्ताव पेश गरेका हुन् ।
बैठकमा मन्त्री, सत्तापक्षका सांसदहरु भने उपस्थित भएनन् । मुख्यमन्त्री राईविरुद्ध नेकपाको प्रचण्ड–नेपाल समूहका ३७ जना सांसदले हस्ताक्षर गरी अविश्वास प्रस्ताव दर्ता गरेका थिए ।
मुख्यमन्त्री राईले प्रचण्ड–नेपाल समूहका १६ सांसदलाई ३ महिना निलम्बन गरेको भन्दै सरकार पक्षका सांसदले बैठकमा उपस्थित नगराउन सभामुख प्रदीपकुमार भण्डारीलाई आग्रह गरेका थिए ।
सत्तापक्षले बहिष्कार गरेको बैठकमा अविश्वासको प्रस्ताव पेश भएसँगै सकिएको छ । अर्को बैठक फागुन २० गतेका लागि बोलाइएको छ । ९३ सदस्यीय प्रदेशसभामा नेकपाका ६७, कांग्रेसका २१, जनता समाजवादी पार्टीका ३, राष्ट्रिय प्रजातन्त्र पार्टी र संघीय लोकतान्त्रिक राष्ट्रिय मञ्चका ११ जना छन् । प्रदेशसभामा बहुमतका लागि ४७ जना सदस्य चाहिन्छ ।
